ՀՀ կառավարությունը որոշեց աջակցել Համաշխարհային համաՀայկական խաղերի կոմիտեին՝ նախատեսված մարզական գյուղի կառուցման համար։ Այս մասին հայտնի դարձավ ապրիլի 9-ի կառավարական նիստից հետո։
Նախագիծը, որի ընդհանուր բյուջեն կազմում է մոտավորապես 20.9 միլիարդ դրամ, կիրականացվի երեք փուլով։ Այն նախատեսում է մարզական գյուղի ստեղծումը, որը կտեղակայվի Կոտայքի մարզի Ջրվեժ համայնքում՝ արգելոց-պուրակային համալիրի 23.3 հեկտար տարածքում։ ՀամաՀայկական խաղերի կոմիտեին այս տարածքը տրամադրվելու է 50 տարի ժամկետով։
Փոխվարչապետ Տիգրան Խաչատրյանը նշեց, որ նախագծի իրականացման առաջին հինգ տարիների ընթացքում կոմիտեն չի կարողանա ֆինանսավորել այն բացառապես սեփական միջոցներով և բարերարների օգնությամբ։ Հետևաբար, կառավարությունը որոշեց աջակցել կոմիտեին՝ պետական բյուջեից ամեն տարի հատկացնելով միջոցներ վարձակալության վճարման համար։
Այսպիսով, հինգ տարվա ընթացքում պետական ներդրումը կկազմի մոտավորապես 165 միլիոն դրամ (տարեկան 35 միլիոն դրամ)։
Մարզական գյուղը, որը նախատեսվում է կառուցել մինչև 6000 մարդու համար, կծառայի ոչ միայն որպես մարզիկների բնակության վայր ՀամաՀայկական խաղերի ժամանակ, այլև կօգտագործվի երիտասարդական տարբեր միջոցառումների համար, այդ թվում՝ սփյուռքահայ ուսանողների համար բնակության, Հայաստան-Սփյուռք համագործակցության բազմամասնագիտական ծրագրերի, ինչպես նաև հանգստի և զվարճանքի համար։
Նախագծի իրականացման արդյունքում նախատեսվում է ստեղծել մոտ 1240 նոր աշխատատեղ և տնկել մոտ 20000 ծառ։ Շինարարության սկզբնական փուլերում կօգտագործվեն էկոլոգիապես մաքուր շինարարական լուծումներ՝ էկո-տնակներ, ճաշարան և բժշկական կենտրոններ։
