Պետական եկամուտների կոմիտեն (ՊԵԿ) հայտնում է, որ իր մաքսանենգության դեմ պայքարի վարչության և Ազգային անվտանգության ծառայության (ԱԱԾ) համատեղ ջանքերով հաջողությամբ է ավարտվել օպերատիվ-հետախուզական միջոցառում, որի արդյունքում բացահայտվել է թմրամիջոցների մաքսանենգության մեծ հարցում։
Օրերս, միջազգային գործընկերների հետ համագործակցության շրջանակում ստացված տեղեկատվության հիման վրա, ՀՀ ՊԵԿ մաքսանենգության դեմ պայքարի վարչությունը ձեռնարկեց անհրաժեշտ միջոցառումներ։ Պարզվեց, որ Հայաստան է ժամանել Նիդերլանդների Թագավորության քաղաքացի Ռ․Դ․-ն, որի մոտ կասկածներ էին առաջացել թմրամիջոցներ մաքսանենգ եղանակով ներմուծելու մասին։
Քաղաքացին, որը նույն օրը Վիեննա-Երևան չվերթով էր ժամանել, հանգրվանվել էր Երևան քաղաքի հյուրանոցներից մեկում։ Որոնողական աշխատանքների ընթացքում նա հայտնաբերվեց և, հիմնավոր կասկածի առկայության հիմքով, ենթարկվեց անձնական մաքսային զննման։ Ռենտգենային սկանավորման արդյունքում նրա որովայնի շրջանում նկատվեցին կասկածելի օտար մարմիններ։
Քաղաքացին անհապաղ տեղափոխվեց «Արմենիա» հանրապետական բժշկական կենտրոն, որտեղ բժիշկների կողմից իր մարմնից դուրս է բերվել «կոկաին» տեսակի թմրամիջոցի 50 պատիճ, որոնց ընդհանուր քաշը կազմում էր 845 գրամ։
Թմրամիջոցների մաքսանենգություն կատարած լինելու անմիջականորեն ծագած հիմնավոր կասկածի առկայության հիմքով Ռ․Դ․-ն ձերբակալվեց։
«Վերահսկելի մատակարարում և գնում» օպերատիվ հետախուզական միջոցառման շրջանակում, որի նպատակը թմրամիջոցների ՀՀ ներկրումը և դրանց հետագա իրացումը կազմակերպելու հնարավոր անձանց բացահայտումն էր, Երևանի հասցեներից մեկում ձերբակալվեցին ևս երկու քաղաքացի՝ Ա․Պ․-ն և Ս․Մ․-ն։ Նրանք նույնպես ձերբակալվեցին մաքսանենգություն և թմրամիջոցների իրացում կատարելու անմիջականորեն ծագած հիմնավոր կասկածի առկայության հիմքով։
Ձերբակալվածներին ներկայացրին ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նրանց նկատմամբ ՀՀ քրեական օրենսգրքի 393-րդ և 399-րդ հոդվածների հատկանիշներով քրեական վարույթ է հարուցվել։ Նրանց բնակության վայրերում իրականացվել են խուզարկություններ։
