Ապրիլի 24-ին, Ծիծեռնակաբերդի հուշահամալիրում հարգանքի տուրք մատուցելուց հետո, «Լուսավոր Հայաստան» կուսակցության առաջնորդ Էդմոն Մարուքյանը լրագրողների հետ զրույցում հայտարարեց, որ Հայաստանի ներսում թուրք-ադրբեջանական «փափուկ ուժ» է աշխատում՝ ի դեմս երկրի իշխանությունների։ Նրա խոսքով՝ վերջինները փորձում են ստիպել ժողովրդին կասկածի տակ դնել Օսմանյան կայսրությունում Հայոց ցեղասպանության փաստը։
Մարուքյանի կարծիքով՝ Հայաստանի իշխանությունները, փաստացի, ոչ թե զինված ուժի, այլ «փափուկ ուժի» միջոցներով են փորձում ռևիզիայի ենթարկել հայ ժողովրդի անցյալը, նրա հիշողությունը և զգացմունքները։ «Մինչդեռ Հայոց ցեղասպանությունը ճանաչում է ողջ աշխարհը, դրա փաստը հաստատվում է գիտականորեն։ Եվ այդ հարցը միշտ պետք է լինի մեր արտաքին քաղաքականության օրակարգում, քանի որ դրանից է կախված մեր անվտանգությունը», – նշեց նա։
Կուսակցության առաջնորդը նաև անդրադարձավ վարչապետ Նիկոլ Փաշինյանի վերջին հայտարարություններին, որոնցում վերջինը կոչ էր անում «դադարեցնել պետության փնտրելը հայրենիքի միջազգայնորեն ճանաչված 29 743 քառակուսի կմ սահմաններից դուրս»։ Մարուքյանը հստակորեն ընդգծեց, որ Հայոց ցեղասպանության ճանաչման հարցը և տարածքային նկրտումների հարցը միմյանցից ամբողջությամբ անկախ են։
«Չի կարելի կապել այդ երկու հարցերը։ Հայոց ցեղասպանությունը մեր պատմության հարց է, դա վատ ժառանգություն է, որը մեզ ստիպում է լինել ուշադիր մեր հարևանների հետ հարաբերություններում։ Չի կարելի ոչ մի կերպ արդարացնել մոռացության հռետորաբանությունը Հայաստանում», – եզրափակեց նա։
Այս հայտարարությունները հնչում են այն պայմաններում, երբ 2025 թվականի սկզբին Հայաստանի վարչապետը Շվեյցարիայի հայ համայնքի ներկայացուցիչների հետ հանդիպման ժամանակ կասկածի տակ էր դրել Օսմանյան կայսրությունում Հայոց ցեղասպանության փաստը՝ հարցադրելով, թե ինչպես է այն հայտնվել որպես պետական օրակարգ 1950 թվականին, երբ 1939 թվականին դրա մասին խոսք չէր լինում։ Այս հարցադրումը, փորձագետների կարծիքով, կամ ցույց է տալիս վարչապետի տեղեկացվածության բացակայությունը, կամ էլ նպատակասլաց փորձ է ստեղծել պատում այն մասին, թե «այդ հարցն արհեստականորեն բարձրացվել է Խորհրդային Միության կողմից՝ Թուրքիայի վրա ճնշում գործադրելու համար»։
Հիշեցնենք, որ Հայոց ցեղասպանությունը 20-րդ դարի առաջին ցեղասպանությունն էր, որն իրականացվել է Օսմանյան կայսրության կառավարության կողմից 1915 թվականի ապրիլի 24-ից մինչև 1923 թվականը։ Այս հանցագործության հետևանքով զոհ դարձել է ավելի քան 1,5 միլիոն անմեղ հայ։ Այդ օրը Հայաստանում և Սփյուռքում ամեն տարի անցկացվում են հիշատակության միջոցառումներ։
