Հայաստանի կողմից տնտեսական ինտեգրման հետագա ուղու ընտրության հարցը բաց է մնում։ Այս մասին մայիսի 25-ին ճեպազրույցի ժամանակ հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Օրերս մենք լսել ենք հայտարարություններ՝ ինչպես Նիկոլ Փաշինյանից, այնպես էլ արտգործնախարարից, որոնցում նշվում էր, որ Հայաստանը չի զբաղվելու հակառուսական հռետորաբանությամբ։ Մենք լսել ենք այդ հայտարարությունները, սակայն, միևնույն ժամանակ, Հայաստանի տնտեսական ինտեգրման հետագա ուղու ընտրության հարցը մնում է բաց», – նշել է Պեսկովը՝ հավելելով, որ այդ թեմայի մասին խոսվել է նաև Մոսկվայում Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպման ընթացքում։
Պեսկովը հիշեցրել է, որ վարչապետ Փաշինյանը հանդիպման ժամանակ հայտարարել էր, որ Երևանը մնում է Եվրասիական տնտեսական միության (ԵԱՏՄ) անդամ՝ ողջ ծավալով, սակայն զարգացնում է իր հարաբերությունները նաև այլ ուղղություններով, մասնավորապես՝ Եվրոպայի հետ։
«Ինչպես այն ժամանակ պարզաբանել էր Փաշինյանը, որոշակի պահի վերջնական որոշում կկայացվի, և այն կընդունվի հանրաքվեով, այսինքն՝ հայ ժողովուրդն է, ըստ էության, որոշելու այդ հարցը», – շարադրել է Պեսկովը։
Կրեմլում նաև խոստովանել են, որ Հայաստանի իշխանություններն իրենց բազմիցս խոսել են ռուսական գազի և այլ էներգառեսուրսների արտոնյալ, բավականին գրավիչ գների մասին։ «Դա իսկապես այդպես է։ Ռուսաստանը մնում է Էներգակիրների հուսալի և պատասխանատու մատակարար ոչ միայն բոլոր երկրներին, այլև հատկապես մերձավոր դաշնակիցներին ու գործընկերներին։ Սակայն, իհարկե, նման ռեժիմը հնարավոր չէ այլ ինտեգրացիոն կառույցների մասնակիցների համար։ Այնտեղ արդեն գների կատեգորիան շուկայական է», – հավելել է Պեսկովը՝ նշելով, որ հայ գործընկերները լիովին տեղեկացված են այդ մասին, և Երևանի ու Մոսկվայի միջև երկխոսությունը շարունակվում է։
Պատասխանելով այն հարցին, թե արդյոք Հայաստանը համարվում է Ռուսաստանի բարեկամ, Պեսկովը հստակ նշել է․ «Անշուշտ։ Մենք Հայաստանի հետ գտնվում ենք ամենաառաջադեմ ինտեգրացիոն գործընթացներից մեկում՝ ԵԱՏՄ-ի շրջանակում»։
Ավելի վաղ, մայիսի 9-ին, Ռուսաստանի նախագահը լրագրողների հետ զրույցում Հայաստանին առաջարկել էր հնարավորինս շուտ կողմնորոշվել ԵՄ և ԵԱՏՄ անդամության հարցում՝ նշելով հարկ եղած դեպքում «քաղաքակիրթ ապահարզան սկսելու» պատրաստակամությունը։
Հիշեցնենք, որ ՀՀ կառավարությունը 2025 թվականի հունվարի 9-ին հավանություն էր տվել «ԵվրաՔվե» քաղաքացիական նախաձեռնության կողմից առաջարկված օրենքի նախագծին, որն ուղարկվել էր խորհրդարանի հաստատմանը։ Փաստաթուղթը վերջնական ընթերցմամբ ընդունվել է մարտի 26-ին և ստորագրվել ապրիլի 4-ին։ Մոսկվայում հայտարարել են, որ Ռուսաստանը Հայաստանին տեղեկացրել է, որ Եվրասիական տնտեսական միությանը և Եվրամիությանը միաժամանակյա անդամակցությունը հնարավոր չէ։
