Մարտի 17-ին, պաշտոնական այցի շրջանակում, Օմանի Սուլթանության մայրաքաղաք Մասկատում տեղի է ունեցել Հայաստանի ԱԳ նախարար Արարատ Միրզոյանի և Օմանի ԱԳ նախարար Բադր բին Համադ բին Համուդ Ալ-Բուսաիդիի միջև հանդիպում։
Զրուցակիցները քննարկել են երկու երկրների միջև համագործակցության զարգացման լայն շրջանակ։ Օմանի ԱԳ նախարարը բարձր է գնահատել այս այցը՝ այն որակելով որպես պատմական, հատկապես նկատառելով տարածաշրջանում ընթացող բարդ իրավիճակը։
Հանդիպման ընթացքում ընդգծվել է Հայաստանի կողմից Օմանում ռեզիդենտ դեսպանության բացման որոշման կարևորությունը՝ որպես երկկողմ հարաբերությունների հետագա խորացման հիմնական քայլ։
Արարատ Միրզոյանն իր երախտագիտությունն է հայտնել Օմանի կողմից ցուցաբերված պատրաստակամության և աջակցության համար՝ նշելով, որ այս քայլը արտացոլում է Հայաստանի մեծ հետաքրքրությունը զարգացնել բազմաշերտ հարաբերություններ Օմանի և ընդհանուր առմամբ տարածաշրջանի երկրների հետ։
Բանակցությունների ընթացքում քննարկվել են տնտեսության, առևտրի, կրթության և մշակույթի ոլորտներում համագործակցության զարգացման հեռանկարները՝ նպատակ ունենալով լիարժեք իրացնել առկա ներուժը։
Մարդկանց միջև շփումների խթանման հարցում ընդգծվել է մուտքի արտոնագրի պահանջի վերացման որոշման և մշտական հիմունքներով ուղիղ չվերթների գործարկման կարևորությունը։ Նախարար Միրզոյանը նաև շնորհակալություն է հայտնել փետրվարի 28-ից գործող Մասկատ-Երևան ուղղությամբ ութ ուղիղ չվերթների կազմակերպման համար, որոնց միջոցով վերադարձվել է շուրջ 550 հայրենի։
Հանդիպմանը նախարարները մտքեր են փոխանակել Մերձավոր Արևելքում ստեղծված իրավիճակի շուրջ՝ ընդգծելով դիվանագիտությանն առաջնահերթություն տալու կարևորությունը և արտահայտելով մտահոգություն քաղաքացիական օբյեկտների խոցման և դրա հետևանքով գրանցված զոհերի առնչությամբ։
Արարատ Միրզոյանն իր գործընկերոջն է ներկայացրել Հայաստանի և Ադրբեջանի միջև հաստատված խաղաղության հետագա ինստիտուցիոնալիզացմանն ուղղված քայլերը՝ ընդգծելով խաղաղության կարևորությունը։
Այցի ավարտին նախարար Միրզոյանը գրառում է կատարել Օմանի ԱԳՆ պատվավոր հյուրերի մատյանում՝ նշելով, որ իր համար մեծագույն պատիվ է լինել Հայաստանի Հանրապետության առաջին ԱԳ նախարարը, ով այցելել է Օմանի Սուլթանություն՝ մի երկիր, որը խորապես հավատում է դիվանագիտությանը և հանդես է գալիս որպես խաղաղության ջատագով։
