Իմ մոտ լուրջ մտահոգություն է առաջացրել Սյունիքում Հայաստանի ԱԳ նախարար Արարատ Միրզոյանի հայտարարությունը, թե հայկական տարածքների մի մասն ադրբեջանական է, – այս մասին հայտարարել է «Ուժեղ Հայաստան» կուսակցության առաջնորդ և վարչապետի թեկնածու Սամվել Կարապետյանը։
Նրա խոսքով՝ նման հայտարարությունը ցույց է տալիս, որ իշխանությունները շարունակելու են միակողմանի զիջումների քաղաքականությունը։ «Դա նշանակում է, որ միակողմանի զիջումների քաղաքականությունը շարունակվելու է։ Նրանք հետագայում էլ կգնան միակողմանի զիջումների։ Այդ մարդիկ չեն հանգստացել», – նշել է Կարապետյանը՝ հավելելով, որ իշխանության ներկայացուցիչներն առաջին անգամ են ասում այդպիսի ճշմարտություն՝ հանդես գալով հենց Սյունիքում։
Սամվել Կարապետյանը Սյունիքի բնակիչներին կոչ է արել պահպանել հանգստություն և ոչնչից չվախենալ։ Նա համոզմունք է հայտնել, որ ընտրությունների արդյունքները վերջ կդնեն Նիկոլ Փաշինյանի իշխանությանը։ «Այս ժամանակներն ավարտվում են։ Մենք կունենանք ուժեղ երկիր, ուժեղ Սյունիք, թող ոչ ոք դրանում չկասկածի», – եզրափակել է նա։
