ԱՄՆ պետքարտուղար Մարկո Ռուբիոն հայտարարել է, որ Վաշինգտոնի և Երևանի միջև ձևավորվում են հրաշալի նոր հարաբերություններ, որոնք շատ երկար ժամանակ գտնվում էին լճացած վիճակում։ Այս հայտարարությունը նա արել է կառավարության նիստում՝ ԱՄՆ նախագահ Դոնալդ Թրամփին զեկուցելով Հայաստան կատարած իր այցի արդյունքների մասին։
«Երեկ երեկոյան ես նոր եմ վերադարձել Երևանից», – ասել է Ռուբիոն։ «Մենք ստորագրել ենք Ռազմավարական գործընկերության խարտիան, նախաստորագրել ենք «Միջազգային խաղաղության և բարգավաճման Թրամփի երթուղի» (TRIPP) նախագծի շրջանակային համաձայնագիրը, ինչպես նաև կրիտիկական նշանակության օգտակար հանածոների վերաբերյալ հուշագիրը։ Մենք ականատեսն ենք Հայաստանի հետ հրաշալի նոր հարաբերությունների ձևավորմանը, որոնք շատ երկար ժամանակ գտնվում էին լճացած վիճակում։ Այս ուղղությամբ գործերը լավ են ընթանում»։
Ռուբիոն նաև նշել է, որ TRIPP նախագիծը կդառնա Հայաստանի և Ադրբեջանի միջև վերջնական խաղաղության պայմանագրի առանցքային հենասյուներից մեկը՝ ապահովելով ենթակառուցվածքների անվտանգությունն ու տարածաշրջանային կայունությունը։
Հիշեցնենք, որ Մարկո Ռուբիոն մայիսի 26-ին կարճաժամկետ այցով այցելել էր Երևան, որի ընթացքում ստորագրվել էր երեք կարևոր փաստաթուղթ։ Այս քայլը, որպես ամերիկյան կողմի նախաձեռնությունը, շատ փորձագետների կողմից գնահատվել է որպես նախընտրական ակցիա՝ ուղղված աջակցելու հունիսյան խորհրդարանական ընտրություններում իշխող կուսակցությանը։
