Հայաստանում ԵՄ պատվիրակության ղեկավար Վասիլիս Մարագոսը հայտնել է, որ Եվրամիության կողմից Հայաստանի ենթակառուցվածքային նախագծերի համար կատարված ներդրումների ընդհանուր գումարը հասել է 2,5 մլրդ եվրոյի։ Այս մասին նա հայտարարել է հարցազրույցի ընթացքում։
Դիվանագետը նշել է, որ ներդրումները կատարվում են ինչպես «Հյուսիս-Հարավ» տրանսպորտային միջանցքի (ՄՏՄ) նախագծի շրջանակում, այնպես էլ այլ կարևոր ուղղություններում։
Մարագոսը նաև ընդգծել է ԵՄ-ի կողմից հայ-իրանական սահմանին, Մեղրի քաղաքում, նոր անցակետի կառուցման աշխատանքները։ Նրա խոսքով՝ Եվրահանձնաժողովի նախագահ Ուրսուլա ֆոն դեր Լյայենը հայտարարել է Ախուրիկում, Երասխում և Մարգարայում գտնվող երեք նոր անցակետերի արդիականացման և կառուցման հարցում օգնության ընդլայնման մասին։
«Սա նախագծերին մեր մասնակցության և տարածաշրջանային փոխկապակցվածությանն աջակցության կոնկրետ օրինակ է», – նշել է Մարագոսը։
Նա հավելել է, որ ԵՄ-ն կաջակցի նաև հյուսիսային երթուղու բարելավմանը, որն անցնում է Հայաստանի տարածքով դեպի Թուրքիայի և Ադրբեջանի սահմաններ։ Այս աջակցությունը ներառված է Ուրսուլա ֆոն դեր Լյայենի կողմից հայտարարված նոր օգնության փաթեթում, որի շրջանակում նախատեսվում է 200 մլն եվրո դրամաշնորհային ֆինանսավորում և 2 մլրդ եվրո՝ ամբողջ տարածաշրջանի համար։
«Դրանից կշահի հայ ժողովուրդը, քանի որ այն կստեղծի փոխկապակցվածության նոր հնարավորություններ։ Նախագծերում աշխատելու են հայաստանցիներ, ինչը բխում է հայ ժողովրդի շահերից», – եզրափակել է նա։
Հիշեցնենք, որ Ուրսուլա ֆոն դեր Լյայենը հուլիսի սկզբին աշխատանքային այց կատարել էր Երևան, որտեղ հանդիպել էր ՀՀ վարչապետ Նիկոլ Փաշինյանի հետ։
