Հունիսի 7-ի ընտրությունների ընթացքում հայտնի դարձած զանգվածային խախտումների պայմաններում ընդդիմության կողմից խորհրդարանական մանդատներ վերցնելը, մեղմ ասած, անտրամաբանական է։ Այս կարծիքը հայտնում է ԱԺ նախկին փոխխոսնակ, արդարադատության նախկին նախարար Արփինե Հովհաննիսյանը։
Նրա խոսքով՝ ընդդիմադիր ուժերը, որոնք խորհրդարան են անցել ժողովրդի աջակցությամբ, այս պայմաններում լավ լուծումներ չունեն։ Իրավիճակը շատ բարդ է, և ցանկացած քաղաքական դասավորության դեպքում նրանք շատ բարձր գին կվճարեն։
«Շատ կարևոր է, որպեսզի որոշումները կայացվեն ոչ թե արտաքին ազդակների ֆոնին, այլ լինեն քաղաքական որոշումներ, որոնք շատ ազնիվ և հասուն կոմմունիկացված լինեն սեփական ընտրողների հետ», – նշել է իրավաբանը։
Հովհաննիսյանը անիրատեսական է համարում շրջանառվող կարծիքները, թե իբրև, եթե ընդդիմությունը մանդատները չվերցնի, ապա գործող վարչապետ Նիկոլ Փաշինյանը կնախաձեռնի օրենսդրական փոփոխություն, որի արդյունքում խորհրդարան կանցնեն այն ուժերը, որոնք բավարար ձայներ չեն հավաքել։ Նրա կարծիքով՝ նման սցենարն անիրատեսական է, հատկապես այն բանից հետո, երբ իշխանամետ ուժերը՝ ի դեմս ԱԺ նախագահ Ալեն Սիմոնյանի, սկսել են այդ քարոզչական լցոնումներն անել։
«Դա ավելի շատ նման է ընդդիմությանը նետված քարոզչական փրկօղակի, թե, իբր, փոխանցում ենք անում ձեզ, վերցրեք և լեգիտիմացրեք մանդատները։ Բայց ես դա համարում եմ անիրատեսական, նույնիսկ, բացառում եմ, քանի որ Փաշինյանը երբեք չի խախտի կարմիր գծերը իր և իր քարոզչական թեզերի նկատմամբ, իսկ նրա ամենակարևոր թեզն այս ընտրությունների արդարության և լեգիտիմության մասին է։ Իսկ նման որոշում կայացնելու դեպքում կնշանակի կեղծել ընտրությունների արդյունքները օրենքի ուժով կամ Սահմանադրական դատարանի որոշմամբ, նկարել ընտրություններ, աղավաղել ժողովրդի ընտրությունը», – կարծում է Հովհաննիսյանը։
Նրա խոսքով՝ նման որոշում կգցի այնպիսի ստվեր ընտրությունների վրա, որ արդեն ոչ ոք չի էլ հիշի, թե ով ինչ ձայներ է ստացել։
Իրավաբանը նաև անլուրջ է համարել այն հնարավորությունը, թե իշխող խմբակցության անդամներին հրապուրելով ընդդիմադիր դաշտ բերելը կարող է լուծել իրավիճակը։
Հիշեցնենք, որ 2026 թվականի հունիսի 7-ին Հայաստանում տեղի ունեցան խորհրդարանական ընտրություններ, որոնց արդյունքում խորհրդարան են անցնում «Քաղաքացիական պայմանագիր», «Ուժեղ Հայաստան» և «Հայաստան» դաշինքները։ Ընտրությունների օրը դիտորդներն ու լրագրողներն ահազանգում էին իշխող ուժի կողմից քվեարկության կազմակերպման բազմաթիվ խախտումների մասին։
