Հայաստանի Հանրապետության Ազգային ժողովի նախագահ Ալեն Սիմոնյանը հրավեր է ուղարկել ԱՊՀ Միջխորհրդարանական վեհաժողովին (ԱՊՀ ՄԽՎ) մասնակցելու Հայաստանում նշանակված հերթական խորհրդարանական ընտրությունների միջազգային դիտարկմանը։
Այս մասին հայտնի է դարձել ԱՊՀ ՄԽՎ-ի հաղորդագրությունից։
Հրավերն ուղղված է Ռուսաստանի Դաշնության Դաշնային ժողովի Դաշնության խորհրդի նախագահ, ԱՊՀ ՄԽՎ-ի խորհրդի նախագահ Վալենտինա Մատվիենկոյին։
Ալեն Սիմոնյանի նամակում նշվում է, որ Հայաստանի Հանրապետության իշխանությունները հանձնառու են ընտրությունները կազմակերպել ժողովրդավարական նորմերին և չափանիշներին համապատասխան՝ ազատության, արդարության և թափանցիկության սկզբունքների ոգով։
Հիշեցնենք, որ Հայաստանի Ազգային ժողովի ընտրությունները նշանակված են 2026 թվականի հունիսի 7-ին։
