Ընտրողների հետ հանդիպման ժամանակ ՀՀ երկրորդ նախագահ, վարչապետի թեկնածու Ռոբերտ Քոչարյանը հայտարարել է, որ «Հայաստան» դաշինքը պատրաստ է վերցնելու երկրի ապագայի համար պատասխանատվությունը։
«Ես կվերականգնեմ հարգանքը Հայաստանի հանդեպ», – նշել է նա՝ խոստանալով խզել Ալիևի հետ կառուցված «տիրոջ և ծառայի» հարաբերությունները։ Քոչարյանը վստահ է, որ Ադրբեջանի հետ խաղաղության պայմանագիրը կստորագրվի լրացումներով, որոնք կերաշխավորեն խաղաղությունը։ «Վստահ եղեք՝ դա հնարավոր է, և մենք դա կանենք», – ընդգծել է նա։
Քաղաքական գործիչը նկարագրել է իր տեսլականը Հայաստանի մասին՝ որպես ժամանակակից արդյունաբերական երկիր, որը կլինի տարածաշրջանում ամենաարդյունավետ զարգացողը՝ ունենալով զարգացած գյուղատնտեսություն և ֆինանսական համակարգ։ Նա խոստացել է վերականգնել Հայաստանի դիրքը որպես ներդրումների համար տարածաշրջանում ամենաընդունակ երկիր։ «Մենք չենք պայքարելու սեփական պատմության, Արարատի, Հայաստանի ազգային եկեղեցու և մեր ինքնության դեմ», – հստակեցրել է Քոչարյանը։
Նրա խոսքով՝ նպատակն է Հայաստանը դարձնել ամենաուժեղ և կայուն երկիրը, որտեղ քաղաքացիները չեն մտահոգվի անվտանգության հարցերով, այլ դրանով պետք է զբաղվի իշխանությունը։ «Դա կլինի երկիր, որը ստիպված չի լինի պայքարել անվերջ ճգնաժամերի դեմ, որտեղ պետական ծառայողը ստիպված չի լինի կատարել անօրինական հրամաններ, որպեսզի չկորցնի աշխատանքը», – նշել է նա։
Քոչարյանը հավելել է, որ Հայաստանում չկա մեկ այլ քաղաքական գործիչ, որը կունենա նրա նման փորձը՝ անվտանգության, կառավարման և խոշոր բիզնեսում։ «Սա եզակի փորձ է, և ես պատրաստ եմ ժամանակս, նյարդերս նվիրել մեր երկրի հաջողությանը։ Այս փորձին ավելացրեք մի թիմ՝ ուժեղ, համարձակ, պատրաստ երկիրը պրոֆեսիոնալ ձևով տանել դեպի ապագա։ Մենք պատրաստ ենք պատասխանատվություն ստանձնել երկրի ապագայի համար և կանենք դա», – ամփոփել է նա։
