Հայաստանը կատարել է իր պարտավորությունները՝ երրորդ երկրների քաղաքացիների համար հայ-թուրքական սահմանի բացման պայմանավորվածության շրջանակում։ Այս մասին լրագրողների հետ զրույցում հայտարարել է հայ-թուրքական հարաբերությունների կարգավորման հարցերով Հայաստանի հատուկ ներկայացուցիչ, ԱԺ փոխխոսնակ Ռուբեն Ռուբինյանը։
Նրա խոսքով՝ Հայաստանն արդեն ավարտել է իր կողմից անցակետի վերականգնման աշխատանքները։ «Լավ նորությունն այն է, որ թուրքական կողմն այս տարի վերջապես սկսել է իր կողմից վերականգնման աշխատանքները», – նշել է Ռուբինյանը՝ ցանկալով ընդգծել, որ գործընթացը շարունակվում է։ «Այսինքն՝ գնդակն այս պահին մեր դաշտում չէ», – ավելացրել է նա՝ նկարագրելով ներկայիս իրավիճակը։
Հայաստանի հատուկ ներկայացուցիչը նաև հիշեցրել է այն քայլերի մասին, որոնք արդեն իրականացվել են երկու երկրների միջև հարաբերությունների կարգավորման շրջանակում։ Դրանց թվում են Երևանի և Ստամբուլի միջև ավիահաղորդակցության վերականգնումը և ուղիղ բեռնափոխադրումների իրականացումը։
«Կա նաև համաձայնություն պատմական Անիի կամուրջը վերականգնելու վերաբերյալ, այս պահին այդ հարցով փաստաթղթավորման գործընթաց է ընթանում», – ամփոփել է Ռուբինյանը՝ ընդգծելով, որ Հայաստանի կողմից ոչ մի խնդիր չկա և պայմանավորվածությունը պետք է իրականացվի։
Հիշեցնենք, որ Հայաստանի և Թուրքիայի միջև հարաբերությունների կարգավորման բանակցություններում Թուրքիայի հատուկ ներկայացուցիչ Սերդար Քըլըչը 2024 թվականի հունվարին հաղորդել էր երկու երկրների միջև պայմանավորվածության մասին՝ նոր թափ հաղորդել երրորդ երկրների քաղաքացիների համար սահմանի բացման աշխատանքներին։
