Բանգկոկում կայացած ՄԱԿ-ի Ասիայի և Խաղաղօվկիանոսյան տարածաշրջանի տնտեսական և սոցիալական հանձնաժողովի (ESCAP) 82-րդ նստաշրջանի շրջանակներում տեղի ունեցած «Ոչ մեկին անտեսել. Ասիայում և Խաղաղօվկիանոսյան տարածաշրջանում բոլոր սերունդների համար հասարակությունների զարգացում» խորագրով վահանակային քննարկման ընթացքում ՀՀ արտաքին գործերի փոխնախարար Ռոբերտ Աբիսողոմոնյանը բարձր է գնահատել ESCAP-ի ջանքերը՝ ուղղված իրավունքների վրա հիմնված սոցիալական պաշտպանության համակարգերի զարգացմանն ուղղված միջոցառումների խթանմանը։
Իր ելույթի ընթացքում փոխնախարարը ներկայացրել է Հայաստանի կառավարության կողմից իրականացվող համապարփակ և ներառական քաղաքականությունը, որը հիմնված է հասարակական կյանքի բոլոր ոլորտներում՝ կրթությունից մինչև առողջապահություն, սոցիալական պաշտպանություն և կանանց լիազորությունների ընդլայնում, հավասարակշռված զարգացման վրա։
Աբիսողոմոնյանը նշել է, որ այս քաղաքականության շրջանակներում մեկնարկել են մի շարք նախաձեռնություններ, որոնք ուղղված են կանանց սոցիալ-տնտեսական լիազորությունների ընդլայնմանը։ Այս ծրագրերը հատկապես կարևոր են գյուղական վայրերում, որտեղ նպատակ ունեն բարելավել կանանց հմտությունները, ապահովել ռեսուրսների հասանելիությունը և խթանել կանանց առաջնորդությունը։
ՀՀ արտաքին գործերի փոխնախարարը նաև ներկայացրել է Հայաստանի 2024-2040 թվականների ժողովրդագրական ռազմավարության հիմքում ընկած գաղափարախոսությունը, որը հիմնված է ընտանիքի բարեկեցության և անհատական լիազորությունների ընդլայնման սկզբունքների վրա։ Ընդգծվել է նաև ՀՀ կառավարության կողմից ներդրված համընդհանուր առողջապահական ապահովագրության համակարգը, որը ապահովում է բնակչության բոլոր խավերի համար բարձրորակ առողջապահական ծառայությունների հասանելիություն։
Եզրափակելով իր ելույթը՝ Ռոբերտ Աբիսողոմոնյանը նկատել է, որ ներառական, կայուն և հավասարակշռված սոցիալական զարգացման հասնելու համար անհրաժեշտ է ամրապնդել միջազգային համագործակցությունը։
